برسلز:
اسلام ٹائمز۔ امریکی وزیر دفاع رابرٹ گیٹس نے کہا ہے کہ افغانستان میں پاکستان کے مفادات کا خیال رکھا جائے گا، امریکہ پاکستان کو تنہا نہیں چھوڑے گا۔ برسلز میں اپنے آخری نیٹو اجلاس کے موقع پر امریکی وزیر دفاع نے کہا کہ پاکستان کے ساتھ تعلقات طویل عرصے سے پیچیدہ ہیں۔ پاکستانیوں کا خیال ہے کہ امریکہ نے انہیں کم از کم چار مرتبہ نظرانداز کیا، انہوں نے کہا کہ پاکستانیوں کو یقین دلانے کی ضرورت ہے کہ افغانستان میں کچھ بھی ہو، امریکہ انہیں تنہا نہیں چھوڑے گا اور پاکستان کے مفادات کا خیال رکھے گا۔ انہوں نے کہا پاکستانی اعتماد کے فقدان کی بات کرتے ہیں، جو بالکل درست ہے۔ اسامہ بن لادن کی ہلاکت کے حوالے سے رابرٹ گیٹس نے کہا کہ اس سے حالات تبدیل ہو سکتے ہیں کیونکہ ملاعمر اور اسامہ کے درمیان تعلقات منقطع ہو چکے تھے۔