افغانستان، امریکی اسلحہ سے لیس طالبان کی باوردی اسپیشل آپریشنز فورسز کی کاروائیاں

واضح رہے کہ طالبان نے پہلا مغربی طرز کا دستہ 2016ء میں صوبہ ہلمند بنایا تھا جسے ریڈ گروپ کا نام دیا گیا۔ ہلمند کے ضلع سنگین میں تعینات اس دستے کو ڈینجر گروپ بھی کہا گیا۔ جب کہ افغان اسپیشل آپریشز فورسز (ایس او ایف) کی طرز پر ان اہلکاروں کو طالبان اسپیشل آپریشنز فورسز کہا گیا۔ ریڈ گروپ نے صوبے میں لڑائی کا پانسہ طالبان کے حق میں پلٹنے میں اہم کردار ادا کیا۔ برطانوی ادارے بی بی سی کے ایک رپورٹر نے جون 2017ء میں ہلمند کا دورہ کیا۔ اس وقت ریڈ گروپ کے بیشتر ارکان وردیوں میں نہیں تھے البتہ ان کے پاس امریکی ایم فور  رائفلیں موجود تھیں۔ تاہم اب تمام ریڈ یونٹ اہلکار باقاعدہ یونیفارمز، ایم فور رائفلوں اور کاربائن رائفلوں سے لیس ہیں۔ ماضی کے برعکس طالبان اب کھلے عام تربیتی مشقیں کرتے ہیں۔

ستمبر 2017ء سے طالبان ان خصوصی دستوں کی ویڈیوز جاری کر رہے ہیں، اسی وقت پہلی بار ان خصوصی دستوں کو شہرت ملی، تاہم اس وقت ان کی تعداد کم تھی، لیکن اب ان دستوں کی تعداد بڑھ چکی ہے اور کئی قوتوں پر اثرانداز ہونے کی کوشش کر رہے ہیں۔ مغربی میڈیا کا کہنا ہے کہ طالبان ان یونٹس کی ویڈیوز طاقت دکھانے اور یہ ثابت کرنے کیلئے جاری کر رہے ہیں کہ وہ کابل فتح کر لیں گے۔ امریکی جریدے ملٹری ٹائمز کا کہنا ہے کہ یہ طالبان کا پروپیگنڈہ ہتھیار ہے۔ تاہم مغربی جرائد ایم فور رائفلوں اور نائٹ وژن گاگلز سے لیس خصوصی طالبان دستوں کی بہتر تربیت کے بھی معترف ہیں۔ افغان صدر اشرف غنی گذشتہ برس ایک انٹرویو میں یہ خدشہ ظاہر کر چکے ہیں کہ امریکی فوج کے بغیر افغان فوج 6 ماہ بھی نہیں گزار سکے گی، خدانخواستہ افغانستان کے مسئلے کا حل مذاکرات کی میز پر نہ نکل سکا تو طالبان کے خصوصی دستے فیصلہ کن ثابت ہوسکتے ہیں۔