پشاور، دوبارہ زندہ ہونیوالے بچےکی کہانی کا ڈراپ سین

اسلام ٹائمز۔ پشاور کے نواحی علاقہ داؤدزئی ناگمان میں 5 ماہ بعد بچے کے دوبارہ زندہ ہونے والی کہانی کا ڈراپ سین ہوگیا۔ ملنے والا بچہ شبقدر کا رہائشی نکلا، جو 3 روز قبل لاپتہ ہوا تھا۔ پولیس نے بچے کو اصل والدین کے حوالے کر دیا۔ پولیس کے مطابق ناگمان بھٹیان کے رہائشی ظفر نامی شخص کا بیٹا عبداللہ 5 ماہ پہلے بجلی کا کرنٹ لگنے سے جاں بحق ہوگیا تھا، 3 دن پہلے چارسدہ کے رہائشی ثناء اللہ نامی شخص کا لاپتہ ہونیوالا بچہ ظفر کے گھر پہنچ گیا۔ لاپتہ بچے کی شکل و صورت، عمر اور نام ایک جیسا تھا، جس پر جاں بحق عبداللہ کے والدین اسے اپنا بیٹا سمجھ بیٹھے اور بچے کے دوبارہ زندہ ہونے کی خبر و ویڈیو سوشل میڈیا پر وائرل ہوگئی کہ 5 ماہ قبل جاں بحق ہونیوالا بچہ عبداللہ قبر سے زندہ نکل آیا ہے۔ بعد ازاں بچے کے اصل والدین تھانہ پہنچے، جنہیں بچہ حوالے کر دیا گیا ہے۔