اسلام ٹائمز۔ بھارتی ریاست راجستھان کے وزیراعلٰی اور کانگریس کے لیڈر اشوک گہلوت نے پارٹی سے نکالے گئے نائب وزیراعلٰی سچن پائلٹ کو نکما قرار دیا۔ انہوں نے کہا کہ سچن پائلٹ نے کانگریس کی پیٹھ میں خنجر گھونپا ہے۔ اشوک گہلوت نے آج جے پور میں میڈیا سے بات چیت کرتے ہوئے بتایا کہ سچن پائلٹ کو پارٹی نے بہت کچھ دیا ہے۔ انہوں نے خلاصہ کرتے ہوئے کہا کہ پارٹی نے انہیں 25 برس کی عمر میں رکن پارلیمنٹ، 26 کی عمر میں مرکزی وزیر اور اس طرح تقریباً 30 برس کی عمر میں انہیں ریاستی صدر بنایا ہے، اس کے باوجود انہوں نے جو کیا وہ بہت بدقسمتی کی ہے۔ انہوں نے کہا کہ سچن پائلٹ کافی عرصے سے سازش رچ رہے تھے اور 10 مارچ کو یہ سازش بے نقاب ہوگئی۔