لاہور تباہی سے بچ گیا، بھارتی معاونت سے لاہور پہنچنے والے 5 دہشتگرد گرفتار

ذرائع سی ٹی ڈی کا کہنا ہے کہ تمام ملزمان کا تعلق افغانستان سے ہے۔ گرفتار دہشتگردوں میں ثمرقند، عبدالرحمان، وزیر گل، عصت اللہ اور عمران شامل ہیں۔ دہشتگرد 2 ماہ پہلے افغان سے آئے تھے۔ افغان انٹیلی جنس ایجنسی کے انڈر کور نے انہیں جلال آباد میں ٹاسک دیا تھا۔ بھارتی خفیہ ایجنسی را کا نمائندہ ملاقات میں موجود تھا۔ دہشتگردوں کو فنڈ بھی "را" کے افسر نے فراہم کئے تھے۔ گرفتار دہشتگردوں کیخلاف تھانہ سی ٹی ڈی میں مقدمہ درج کر لیا گیا ہے۔

دیگر ذرائع کے مطابق سی ٹی ڈی نے لاہور میں دہشت گردی کا منصوبہ ناکام بنا دیا، شاہدرہ سے کالعدم تنظیم کے 5 دہشت گرد گرفتار کر لیے گئے۔ ترجمان سی ٹی ڈی کے مطابق دہشت گردوں کا منصوبہ سول سیکرٹریٹ کو نشانہ بنانا تھا، اُن کے قبضے سے دستی بم، اسلحہ، افغان کرنسی، موبائل فون، حساس مقامات کی ویڈیوز برآمد ہوئی ہیں۔ ابتدائی تحقیقات کے مطابق دہشت گرد 2 ماہ پہلے افغانستان سے پاکستان آئے تھے، انہیں بھارتی خفیہ ایجنسی را کے آفیسر نے جلال آباد میں ملاقات کے دوران فنڈز فراہم کیے تھے۔ سی ٹی ڈی نے گرفتار دہشت گردوں کے خلاف مقدمہ درج کر لیا ہے۔