کورونا بحران کی تیسری لہر سے قبل آکسیجن کا اسٹاک تیار رکھا جائے، سپریم کورٹ

اسلام ٹائمز۔ سپریم کورٹ آف اںڈیا نے جمعرات کو بھارتی  حکومت کو مشورہ دیا ہے کہ وہ ملک میں کورونا وبا کی تیسری لہر کے امکانات کے پیش نظر اب سے تیاریاں شروع کر دے۔ جسٹس ڈی وائی چندرچوڑ کی سربراہی میں بنچ نے آکسیجن کی فراہمی سے متعلق سماعت کے دوران کہا کہ لوگوں میں آکسیجن کی کمی پر گھبرانا نہیں چاہیئے، یہ ضروری ہے کہ تیسری لہر آنے سے پہلے آکسیجن کا بفر اسٹاک بنایا جائے۔ تیسری لہر کے امکان پر تشویش کا اظہار کرتے ہوئے جسٹس چندرچوڑ نے بھارت کی مودی حکومت سے مطالبہ کیا کہ وہ تیسری لہر کے طور پر کورونا کی ہولناک صورتحال سے نمٹنے کے لئے ملکی سطح پر کوئی لائحہ عمل مرتب کرے۔

عدالت عظمٰی نے کہا کہ تیسری لہر سے نمٹنے کے لئے آج ہی تیاریاں شروع کردیں۔ عدالت نے کہا ’’اس وقت بچے بھی انفکشن سے متاثر ہوسکتے ہیں، اس صورتحال میں آپ کیا کریں گے۔؟ بچوں کو ٹیکہ دہنے کے انتظام یقینی بنایا جائے‘‘۔ تیسری لہر سے نمٹنے کے لئے عدالت نے بنیادی ڈھانچے کو بہتر بنانے کے ساتھ قومی داخلہ اہلیت ٹیسٹ (این ای ای ٹی) کی تیاری کرنے والے طلباء اور نرسوں کو لگانے کا بھی مشورہ دیا ہے۔