اسلام ٹائمز۔ لاہور کے تھانہ ستوکتلہ میں ممتاز عالم دین علامہ شہنشاہ نقوی کیخلاف توہین صحابہ کے الزام میں مقدمہ درج کر لیا گیا۔ تفصیلات کے مطابق تھانہ ستوکتلہ میں شہری خالد محمود ولد خواجہ اصغر علی نے درخواست دائر کی کہ ذاکر شہنشاہ نقوی نے اپنے تقریر کے دوران صحابہؓ کی شان میں گستاخانہ الفاظ استعمال کئے اور ان کی تقریر کو ’’باقر ٹی وی‘‘ پر بھی نشر کیا گیا۔ درخواست گزار نے موقف اختیار کیا کہ علامہ شہنشاہ نقوی کے ان الفاظ سے صحابہ کرام کی توہین ہوئی اور ہمارے جذبات مجروح ہوئے ہیں، جس پر ان کیخلاف قانونی کارروائی عمل میں لائی جائے۔ پولیس تھانہ ستوکتلہ نے شہری خالد محمود کی درخواست پر مقدمہ درج کرلیا۔