ایران نے صیہونی رژیم کو فیصلہ کن جواب دیکر غزہ کے عوام کو خوش کر دیا ہے، فلسطینی صحافی

اسلام ٹائمز۔ غزہ کے شمال میں رہنے والے فلسطینی صحافی و میڈیا ایکٹیوسٹ ابو مصطفی نے غاصب صیہونی رژیم کے خلاف اسلامی جمہوریہ ایران کے فیصلہ کن ردعمل (وعدۂ صادق) کا ذکر کرتے ہوئے تاکید کی ہے کہ ہم غزہ کے عوام، غاصب صیہونی رژیم کے خلاف ایران کے اس بہادرانہ ردعمل پر بہت خوش ہیں، غزہ کے عوام کے دل ایران کے اس بہادرانہ آپریشن سے "ٹھنڈے" ہوئے ہیں!

نمائندہ اسلام ٹائمز معصومہ فروزان کے ساتھ اپنی گفتگو میں ابومصطفی نے غزہ کی موجودہ صورتحال بالخصوص غزہ کے شمال میں جاری حالات کے بارے کہا کہ کئی ایک مہینوں کی بھوک و پیاس، صحت کی خراب صورتحال اور زندگی گزارنے کے لئے بنیادی ترین سہولیات کی اشد کمی کے بعد اب بہت ہی کم امداد غزہ پہنچی ہے۔

غزہ کے شمال میں رہنے والے اس فلسطینی صحافی نے تاکید کی کہ اس وقت غزہ کی صورتحال بہت مشکل اور ناگفتہ بہ ہے، متعدی بیماریاں، پانی کی کمی اور یہاں تک کہ کھانا پکانے کے لئے گیس کا فقدان بھی غزہ کے بہت سے مسائل میں سے ایک ہے کہ جن سے ہم اس وقت نبرد آزما ہیں۔

اپنی گفتگو کے آخر میں ابو مصطفیٰ کا کہنا تھا کہ ان تمام پریشانیوں کے باوجود ہم اب بھی خدائے رحمن کے فضل و مدد کی امید رکھے ہوئے ہیں!!