پاراچنار، امام بارگاہ کے باہر زوردار دھماکہ

اسلام ٹائمز۔ پاراچنار کو ایک بار پھر دہشتگردی کا نشانہ بنایا گیا ہے۔ شہر کے وسط میں مرکزی امام بارگاہ کے دروازے پر ہونے والے بم دھماکے میں 22 افراد شہید اور 50 سے زائد زخمی ہوگئے۔ وزیراعظم نے دھماکے کی شدید الفاظ میں مذمت کی ہے۔ پولیٹیکل انتظامیہ کے مطابق نور مارکیٹ میں بم دھماکہ کار سے کیا گیا، دھماکے بعد گاڑی کے ٹکرے دور دور جاگرے، جبکہ متعدد دکانوں اور وہاں کھڑی گاڑیوں کو بھی نقصان پہنچا، پاک فوج کے اہلکاروں سمیت سکیورٹی فورسز نے علاقے کو گھیرے میں لے لیا ہے۔ آئی ایس پی آر کے مطابق دھماکے کے زخمیوں کو نکالنے کیلئے آرمی ایویکیوشن یونٹ سے تعلق رکھنے والے ہیلی کاپٹر جائے وقوعہ پر بھیجے گئے۔ پولیٹیکل انتظامیہ کے مطابق دھماکے کے بعد زخمیوں کو ہسپتال منتقل کر دیا گیا ہے اور تمام طبی مراکز پر ایمرجنسی نافذ کر دی گئی ہے۔ ریسکیو ذرائع کے مطابق مرنے والوں میں خاتون اور 2 بچے شامل ہیں، زخمیوں میں 10 سے زائد افراد کی حالت تشویشناک ہے۔ پاراچنار دھماکے کے بعد پشاور کے حیات آباد میڈیکل کمپلکس اور لیڈی ریڈنگ اسپتال میں بھی ایمرجنسی نافذ کر دی گئی ہے۔ انتظامیہ کا کہنا ہے کہ ڈاکٹر، پیرامیڈکس، نرسز اور دیگر متعلقہ اسٹاف کو طلب کر لیا ہے۔ وزیراعظم نواز شریف نے دھماکے کی شدید مذمت کرتے ہوئے غمزدہ خاندانوں سے ہمدردی کا اظہار کیا ہے۔ وزیراعظم کا کہنا ہے کہ دہشتگردی کا ہر قیمت پر مکمل خاتمہ کیا جائے گا۔ وفاقی وزیر داخلہ چوہدری نثار نے پاراچنارا بم دھماکے پر افسوس کا اظہار کرتے ہوئے ابتدائی رپورٹ طلب کرلی ہے۔ رواں سال جنوری میں پاراچنار کی سبزی منڈی میں ہونے والے دھماکے میں 21 افراد جاں بحق اور 50 سے زائد زخمی ہوگئے تھے۔