دستخطی مہم، فاٹا انضمام

اسلام ٹائمز۔ پاکستان میں وفاق کے زیر انتظام قبائلی علاقے (فاٹا) کو خیبر پختونخوا میں ضم کرنے کیلئے فاٹا یوتھ جرگے کے تحت قبائلی علاقوں اور پاکستان کے مختلف شہروں میں موجود پریس کلبوں کے سامنے دستخطی مہم شروع کی ہے۔ خیبر پختونخوا کے صوبائی دارالحکومت پشاور پریس کلب کے سامنے بھی فاٹا سے تعلق رکھنے والے سیاسی و سماجی کارکنوں نے اس مہم میں حصہ لیا، جس میں سیاسی جماعتوں، بشمول جماعت اسلامی، پاکستان تحریک انصاف، پاکستان پیپلز پارٹی، عوامی نیشنل پارٹی اور فاٹا یوتھ تنظیموں کے کارکنان نے بڑی تعداد میں اپنے دستخط کئے۔ دستخطی مہم کے شرکاء کا کہنا تھا کہ قبائلی عوام صوبہ خیبر پختونخوا کے ساتھ انضمام چاہتے ہیں۔ فاٹا سے تعلق رکھنے والے اسلامی جمعیت طلباء کے ناظم وسیم حیدر نے کہا کہ یہ ایک علامتی احتجاج ہے کیونکہ فاٹا کے عوام کو پاکستان کے اعلٰی عدلیہ تک رسائی ممکن نہیں ہے۔ اس لئے اس مہم کی کامیابی کے باوجود بھی ہم سپریم کورٹ آف پاکستان میں پٹیشن دائر نہیں کرسکتے۔ یاد رہے کہ فاٹا کے قبائلی علاقوں میں انتظامی اصلاحات کی سوچ کا آغاز اس وقت ہوا تھا، جب 2015ء میں اس وقت کے وزیراعظم نوازشریف نے سرتاج عزیز کی سربراہی میں ایک 5 رکنی فاٹا اصلاحاتی کمیٹی تشکیل دی تھی۔ اس کمیٹی نے 7 ایجنسیوں پر مشتمل قبائلی علاقوں کے دورے کرنے کے بعد 2016ء میں اپنی ایک رپورٹ وزیراعظم کو پیش کی تھی جس کے مطابق فاٹا کے لاکھوں باشندے اپنے علاقوں کا صوبے خیبر پختونخوا کے ساتھ انضمام چاہتے ہیں۔