ملتان، شیعہ مسنگ پرسنز کی بازیابی کیلئے احتجاجی ریلی

اسلام ٹائمز۔ شیعیان حیدر کرار کی جانب سے ملک بھر سے لاپتہ افراد کی بازیابی کے لیے نماز جمعہ کے بعد حیدریہ چوک سے احتجاجی ریلی نکالی گئی، ریلی کی قیادت مجلس وحدت مسلمین جنوبی پنجاب کے سیکرٹری جنرل علامہ اقتدار حسین نقوی، ڈپٹی سیکرٹری جنرل سلیم عباس صدیقی، آئی ایس او ملتان کے ڈویژنل صدر شہریار حیدر، سابق مرکزی رہنما زاہد مہدی، قارب نوید ہاشمی، مرزا وجاہت علی اور شعیب نقوی نے کی۔ ریلی 6 نمبر چونگی پر پہنچ کر جلسے میں تبدیل ہوگئی۔ ریلی میں مردوں کے ساتھ ساتھ خواتین اور بچوں کی بھی بڑی تعداد شریک تھی۔ جنہوں نے بینرز، پلے کارڈز اور مسنگ پرسنز کی تصاویر اٹھا رکھی تھیں۔ ریلی سے خطاب کرتے ہوئے علامہ اقتدار حسین نقوی کا کہنا تھا کہ ریاست کا دوہرا معیار ہے، قاتل کو رہائی دی جا رہی ہے، جبکہ محب وطن شہریوں کو جبری طور پر گمشدہ کیا جا رہا ہے۔

انہوں نے کہا کہ ریاست مدینہ کے جھوٹے دعویدار کو آئین اور قانون کی دھجیاں بکھرتی نظر نہیں آرہیں، کچھ ادارے اس ملک کے آئین اور قانون سے کھلواڑ کر رہے ہیں، جس سے نہ صرف پاکستان بلکہ عالمی سطح پر جگ ہنسائی ہو رہی ہے۔ ریلی سے خطاب کرتے ہوئے دیگر رہنمائوں کا کہنا تھا کہ شیعہ مسنگ پرسنز کا معاملہ ایک منظم سازش کے تحت شروع کیا گیا، تاکہ ملک کے امن کو سبوتاژ کیا جائے، طالبان سرغنہ احسان اللہ احسان کے فرار کی خبریں قابل تشویش ہیں۔