اسلام ٹائمز۔ عوامی مسلم لیگ کے سربراہ شیخ رشید احمد نے کہا ہے کہ ملک کے 12 بنیادی ادارے گیلانی خاندان نے تباہ کیے ہیں، پی آئی اے کے جہازوں کی یہ صورتحال ہے کہ انتالیس میں سے اکیس جہاز گرائونڈ ہیں اور حج سیزن بھی آچکا ہے، سابقہ دور میں لال مسجد، اکبر بگٹی اور چیف جسٹس کے خلاف فیصلہ بہت غلط تھا اور اس وقت پرویز مشرف جیل جا ئیں گے تو کوئی سیاسی مقام پائیں گے۔ ملتان پریس کلب میں پریس کانفرنس سے خطاب کرتے ہوئے انہوں نے کہا ہے کہ ملکی بقاء کے لئے وقت پر الیکشن انتہائی ضروری ہیں، ایک سوال کے جواب میں شیخ رشید نے کہا کہ ملک میں معاشی صورتحال انتہائی خراب ہے، کراچی لاہور کے سانحے المناک ہیں، اس سے بھی ملکی معیشت پر اثر پڑے گا۔