شہید چوہدری اسلم پر خودکش حملہ کرنیوالے ملزم کی شناخت نعیم اللہ کے نام سے ہوگئی

اسلام ٹائمز۔ چوہدری اسلم پر خودکش حملہ کرنے والے ملزم کی شناخت ہوگئی ہے۔ ذرائع کے مطابق حملہ آور دہشتگرد کا نام نعیم اللہ ہے جو کراچی میں ایک مقامی مدرسہ کا طالب علم تھا، پولیس کے مطابق اس سے قبل بھی مذکورہ مدرسہ کا ایک اور طالب علم خودکش حملہ کرچکا ہے۔ حملہ آور کی شناخت جائے وقوع سے ملنے والی انگلیوں کی مدد سے کی گئی۔  تفصیلات کے مطابق اورنگی ٹاؤن کے علاقے قصبہ کالونی میں سی آئی ڈی پولیس نے چوہدری اسلم کے قتل میں ملوث ملزمان کی اطلاع پر آپریشن کیا۔ ذرائع کے مطابق کارروائی میں چوہدری اسلم پر حملے میں ملوث 2 مبینہ ملزمان کو گرفتار کرلیا گیا۔ حراست میں لیے جانے والے ملزمان کے نام غلام اللہ اور قاری صدیق ہیں۔ پولیس نے یہ کارروائی اورنگی ٹاؤن میں واقع نعیم اللہ نامی شہری کے گھر پر کی۔ آپریشن میں سی آئی ڈی کی 10 موبائلوں نے حصہ لیا۔

پولیس ذرائع کے مطابق یہ کارروائی دھماکے کے بعد زخمی حالت میں گرفتار مبینہ ملزم کی نشاندہی پر کی گئی ہے۔ منگھو پیر، سلطان آباد، کنواری کالونی میں بھی سرچ آپریشن کیا جا رہا ہے۔ دوسری جانب ذرائع کے مطابق سی آئی ڈی پولیس نے آج شام کو کراچی کے ایک نجی اسپتال میں چھاپہ مار کر وہاں سے ایک مبینہ حملہ آور کو گرفتار کیا تھا۔ تفتیشی ذرائع کے مطابق حملے کے بعد مسلح حملہ آوروں اور چوہدری اسلم کے اسکواڈ میں شامل پولیس محافظوں کے درمیان فائرنگ کا تبادلہ بھی ہوا تھا۔ جس سے ایک شخص زخمی ہوا تھا۔ زخمی حملہ آور کو دھماکے سے چوٹیں بھی آئیں تھیں۔