آئی ایم ایف سے چھٹکارہ حاصل کئے بغیر ملک آگے نہیں بڑھ سکتا، ثروت اعجاز قادری

اسلام ٹائمز۔ پاکستان سنی تحریک کے سربراہ محمد ثروت اعجاز قادری نے کہا ہے کہ ملک کو خطرہ حکومت سے نہیں بلکہ معاشی ناقص پالیسیوں سے ہے، ڈالر کی اونچی اڑان کا نہ رُکنا معیشت کے عدم استحکام ہونے کی علامت ہے، گیس کی قیمتوں میں اضافہ واپس نہ لیکر غریبوں کو محرومیوں کی طرف دھکیلا جا رہا ہے، موجودہ بجٹ ملک کا نہیں بلکہ آئی ایم ایف کا بجٹ ہے، جو کئی دھائیوں سے پاکستان کو معاشی طور پر دیمک کی طرح کھا رہا ہے، ان خیالات کا اظہار انہوں نے کراچی میں مرکز اہلسنت پر سکھر سے آئے ہوئے وفد سے گفتگو کرتے ہوئے کیا۔ ثروت اعجاز قادری نے مزید کہا کہ آئی ایم ایف سے چھٹکارہ حاصل کئے بغیر ملک معاشی طور پر آگے نہیں بڑھ سکتا، غریبوں کو بجلی، گیس، پانی اور پیٹرول پر ریلیف دینے کی بجائے اضافہ کرکے بھوکے مرنے پر مجبور کیا جا رہا ہے۔ انہوں نے کہا کہ پی ٹی آئی حکومت نے اپنی پالیسیوں کو نہیں بدلا تو پھر عوام تبدیلی کا مکمل حق رکھتے ہیں، حکومتی معاشی پالیسیاں کسی طور بھی عوام دوست نہیں ہیں۔