اسلام ٹائمز۔ سابق گورنر پنجاب سردار ذوالفقار علی خان کھوسہ نے اپنی رہائش گاہ کھوسہ منزل میں قبائلی عمائدین، سابق ناظمین، سیاسی ورکرز اور نوجوانوں کے وفود سے بات چیت کرتے ہوئے کہا ہے کہ کشمیر کی وادی آگ اور لہو کی تصویر بن چکی ہے، ہمیں سفارتی سطح پر کشمیر کا مقدمہ لڑنا ہوگا، کشمیری بھائیوں سے یکجہتی کے لئے پاکستانیوں نے جس محبت کا اظہار کیا ہے، وہ ظاہر کرتا ہے کہ ہم کشمیریوں کو تنہا نہیں چھوڑیں گے، سردار ذوالفقار علی خان کھوسہ نے کہا کہ کشمیریوں کو اقوام متحدہ کی قراردادوں کے مطابق استصواب رائے کا حق دیا جائے اور وہ خود فیصلہ کریں کہ وہ پاکستان کے ساتھ رہنا چاہتے ہیں یا بھارت کے ساتھ۔ انہوں نے کہا کہ کشمیر میں آزادی کا سورج جلد طلوع ہوگا۔