اسلام ٹائمز۔ آزادکشمیر کے صدر سردار مسعود خان نے کہا ہے کہ اگر کشمیر کے مسئلہ پر بھارت اور پاکستان کے درمیان جنگ ہوئی تو وہ ایسی جنگ ہو گی جس سے بڑی تباہی آئے گی۔ایسی کسی جنگ سے پہلے بین الاقوامی برادری مداخلت کرے اور تنازع کشمیر اقوام متحدہ کی قراردادوں اور کشمیری عوام کی خواہشات کے مطابق حل کرانے کے لیے اپنا کردار ادا کرے۔ یہ بات اُنہوں نے فارن سروس اکیڈمی اسلام آباد میں زیرتربیت غیرملکی سفارتکاروں کے ایک وفد سے گفتگو کرتے ہوئے کہی۔ایوان صدر مظفرآباد میں ہونے والی اس ملاقات میں افغانستان، بحرین، بلغاریہ، وسطی افریقہ، ایتھوپیا، عراق، قزاقستان، کرغزستان، مالدیپ، مالی، موریطانیہ، مراکش، نمبیا، نیپال، فلسطین، جنوبی افریقہ، سوڈان، سری لنکا، تاجکستان، یوکرائن، ازبکستان، یمن اور زیمبیا کے سفارتکار شامل تھے۔