یہ تاثر غلط ہے کہ کورونا ٹیسٹ مثبت آنے پر حکومت مریض کو زبردستی ہسپتال منتقل کردیتی ہے، مرتضیٰ وہاب

اسلام ٹائمز۔ سندھ حکومت کے ترجمان بیرسٹر مرتضیٰ وہاب نے کہا ہے کہ یہ تاثر غلط ہے کہ کورونا ٹیسٹ مثبت آنے پر حکومت مریض کو زبردستی ہسپتال منتقل کردیتی ہے، بعض عناصر کی طرف سے یہ غلط تاثر پھیلایا جارہا ہے۔ کورونا کے مریضوں سے متعلق اہم ویڈیو بیان میں مرتضیٰ وہاب نے کہا کہ خدانخواستہ کسی کا کورونا ٹیسٹ مثبت آتا ہے اور اس میں علامات نہیں ہیں تو وہ خود کو اپنے گھر میں آئیسولیٹ کرے، کورونا مثبت آنے کے باوجود جس شخص میں علامات نہیں ہیں وہ اے کیٹگری میں آتا ہے، اس حوالے سے سندھ حکومت نے ایس او پیز بھی جاری کر رکھی ہیں۔ انہوں نے کہا کہ اس تاثر کو زائل کرنا انتہائی ضروری ہے تاکہ شہری بلا خوف اپنا ٹیسٹ کروائیں، شہری اپنا کورونا ٹیسٹ کروانے سے مت گھبرائیں۔

ان کا کہنا تھا کہ کسی بھی شخص میں کورونا علامات ہیں تو محکمہ صحت کی ہیلپ لائن سے رجوع کرے، محکمہ صحت کی ٹیم گھر آکر اس فرد کا مفت ٹیسٹ کریگی، ٹیسٹ مثبت آنے پر محکمہ صحت کی ٹیم متعلقہ شخص کو گائیڈ کریگی تاکہ وہ بہتر انداز میں اپنی دیکھ بھال کرسکے، ایسا قطعی نہیں کہ حکومت زبردستی اسے اسپتال میں داخل کریگی۔ انہوں نے کہا کہ ہمیں ذمہ دار شہری ہونے کا ثبوت دینا ہوگا، شہری حکومتی اداروں پر اعتماد کرتے ہوئے گھبرائے بنا اپنا ٹیسٹ کروائیں، اے کیٹگری والے کورونا مریض کے ساتھ کوئی زبردستی نہیں کی جاتی، ایسے افراد خود کو گھر میں آئیسولیٹ کرسکتے ہیں جس کے لئے حکومت انکی مدد کریگی۔