ای گیمز کی تیاری کیلئے پاکستان اسپورٹس بورڈ اور پاکستان سائنس فاونڈیشن کے درمیان یادداشت پر دستخط

اسلام ٹائمز۔ وفاقی وزیر سائنس اینڈ ٹیکنالوجی فواد چوہدری نے کہا ہے کہ پاکستان اسپورٹس بورڈ اور پاکستان سائنس فاونڈیشن کے درمیان یادداشت طے پاگئے ہیں، جس کے تحت ای اسپورٹس کو باقاعدہ کھیل کا درجہ حاصل ہوگا۔ فواد چوہدری نے ٹوئٹر پر کہا کہ اگر آپ کو ویڈیو گیمز سے دلچسپی ہے تو تیار ہو جائیں اور نئے مواقع آپ کے منتظر ہیں۔ اس سے قبل فواد چوہدری نے اعلان کیا تھا کہ ان کی وزارت ویڈیو گیمز کے شوقین افراد کے لیے اینیمیشن اور ویڈیو گیمز کا خصوصی پروگرام لارہی ہے۔

سماجی رابطے کی ویب سائٹ ٹوئٹر پر کیے گئے ٹوئٹ میں فواد چوہدری نے کہا تھا کہ اگر آپ کو پڑھنے سے دلچسپی نہیں اور فون پر ویڈیو گیمز سے رغبت ہے تو تیاری رکھیں ہماری وزارت ویڈیو گیمز پروگرامنگ کا خصوصی پروگرام لارہی ہے۔ فواد چوہدری نے کہا تھا کہ اس کے ذریعے ہم 90 ارب ڈالر کی اس انڈسٹری کا حصہ بن سکیں گے اور نوجوانوں کو گیمز سرٹیفیکیٹس بھی دیے جائیں گے۔ فواد چوہدری کے اعلان کے بعد سے ٹوئٹر صارفین کی جانب سے ان کے مذکورہ اقدام کو سراہا گیا اور ساتھ ہی مختلف تجاویز بھی دی گئی تھیں۔

واضح رہے کہ ای اسپورٹس دنیا بھر میں ایک صنعت کا درجہ رکھتی ہے اور اگست 2019 میں پاکستانی نوجوان نے امریکا میں ہونے والی دنیا کی سب سے بڑی ای اسپورٹس گیمنگ چیمپیئن شپ میں ٹیکن 7 گیم کی ٹورنامنٹ جیت لی تھی۔ امریکی شہر لاس وگاس میں 2 سے 4 اگست تک ہونے والی دنیا کی سب سے بڑی ای اسپورٹس گیمنگ چیمپیئن شپ میں جنوبی کوریا، جاپان، چین اور امریکا کے ماہر گیمنگ کھلاڑیوں سمیت دیگر ممالک کے نوجوانوں نے بھی شرکت کی تھی۔ گیمنگ کو بطور کیرئیر بھی منتخب کیا جارہا ہے اور یوٹیوبرز کی طرح اب گیمرز کے لیے بھی آگے بڑھنے کے بہت سے مواقع موجود ہیں۔