اسلام ٹائمز۔ وزیراعلیٰ بلوچستان عبدالقدوس بزنجو اور گوادر کو حق دو تحریک کے رہنماء مولانا ہدایت الرحمان کے درمیان آج گودار میں مذاکرات کیلئے پہلی ملاقات ہوئی۔ جس میں گوادر دھرنے کے متعدد مطالبات تسلیم کرلئے گئے ہیں۔ اطلاعات کے مطابق کل بروز جمعرات وزیراعلیٰ بلوچستان خود گوادر دھرنے کے شرکاء سے خطاب کریں گے۔ تفصیلات کے مطابق مولانا ہدایت الرحمان سے مذاکرات کے دوران وزیراعلیٰ بلوچستان قدوس بزنجو، صوبائی وزیر ظہور بلیدی، سید احسان شاہ، حاجی اکبر آسکانی اور چیف سیکرٹری بلوچستان نے حصہ لیا۔ زرائع کے مطابق مولانا ہدایت الرحمان کے بیشتر مطالبات منظور کیے گئے ہیں، جبکہ مذاکرات کو آگے بڑھانے کیلئے کل ایک اور ملاقات طے پائی ہے۔