Thursday 3 Dec 2020 10:27

ڈاکٹر کلب صادق خاندانی پس منظر اور سماجی خدمات

اسلام ٹائمز: ڈاکٹر کلب صادق کے دادا آیت اللہ سید آقا حسن اپنے زمانہ کے مجتہد تھے۔ آپکے والد آیت اللہ سید کلب حسین بھی ایک عظیم عالم دین تھے۔ آپ نے ابتدائی تعلیم گھر میں اپنے والد گرامی سے حاصل کی اور اعلیٰ تعلیم کیلئے جامعہ سلطانیہ سلطان المدارس کا رخ کیا۔ وہاں سے صدر الافاضل کی سند حاصل کی، ساتھ ہی عصری تعلیم میں علی گڑھ مسلم یونیورسٹی سے بی اے کیا۔ لکھنؤ یونیورسٹی سے عربی زبان میں پی ایچ ڈی کی۔ ڈاکٹر کلب صادق اپنی قوم اور مسلم امہ کے حالات میں بہتری کیلئے مسلسل کوشاں رہتے تھے۔ وہ سمجھتے تھے کہ ہمارے مسائل کا حل علم میں ہے۔ علم کیطرف عوام کو راغب کرنا انکا مستقل شیوہ تھا۔ اس کیلئے انھوں نے متعدد علمی اداروں کی بنیاد رکھی۔ مسلمانوں کی معاشی اور سماجی صورتحال کو بہتر بنانے کیلئے بھی انھوں نے متعدد فلاحی منصوبوں کا آغاز کیا۔

تحریر: سید اسد عباس

ڈاکٹر کلب صادق 22 جون 1939ء میں لکھنؤ کے معروف اور علمی خانوادے، خاندان اجتہاد میں پیدا ہوئے۔ اس خاندان کو یہ شرف حاصل رہا ہے کہ اس نسل میں کئی ایک نوابغ اور علمی شخصیات پیدا ہوئیں۔ یہ خاندان سبزوار سے ہندوستان کے علاقے جائس میں آکر آباد ہوا۔ اسی خاندان کے بزرگ سید نصیرالدین کے سبب علاقے کا نام نصیر آباد پڑ گیا۔ کتاب مشجر المبارکہ کے مطابق سید نصیر الدین کا شجرہ: سید نصیر الدین بن سید علیم الدین بن علم الدین بن شرف الدین بن نجم الدین سبزواری بن علی بن ابو علی بن ابو یعلی محمد الدقاق بن ابو القاسم طاہر ثانی بن محمد الدانقی بن ابو القاسم طاہر بن امام علی نقی علیہ السلام بن امام محمد تقی علیہ السلام بن امام علی رضا علیہ السلام بن امام موسیٰ کاظم علیہ السلام بن امام جعفر صادق علیہ السلام بن امام محمد باقر علیہ السلام بن امام زین العابدین علیہ السلام بن امام حسین علیہ السلام بن امام علی علیہ السلام۔

سید نصیر الدین کی نسل سے ایک معروف عالم دین اور مرجع سید دلدار علی نقوی نصیر آبادی المعروف غفران مآب متولد ہوئے۔ مولانا جابر جوراسی ہندوستان میں شائع ہونے والے مجلے ماہنامہ اصلاح کے مرجعیت نمبر میں علامہ دلدار نقوی کے بارے میں لکھتے ہیں: آپ کی ولادت شب جمعہ ۱۱۶۶ ھ میں بمقام نصیرآباد ضلع رائے بریلی میں ہوئی۔ ورثۃ الانبیاء میں ہے کہ جب آپ پیدا ہوئے تو اس مکان میں ایک نور ساطع ہوا۔ "نجوم السماء" میں ہے کہ ابتداء میں کتب علوم عقلیہ فضلائے ہند مثلاً سندیلہ میں ملا حیدر علی پسر ملا حمداللہ سندیلوی سے اور الہ آباد میں رہ کر سید غلام حسین دکنی سے پڑھیں، پھر رائے بریلی میں مولوی باب اللہ شاگرد ارشد ملا حمداللہ ممدوح سے پڑھیں۔ پھر فیض آباد سے ہوتے ہوئے لکھنؤ تشریف لائے اور نواب سرفراز الدولہ مرزا حسن رضا خان صاحب کی مدد سے براستہ سندھ زیارات مشاہد مقدسہ سے مشرف ہو کر کربلائے معلیٰ میں آقا باقر بہبہانی اور آقا سید علی طباطبائی اور آقا سید مہدی موسوی شہرستانی سے اور نجف اشرف میں حضرت بحرالعلوم آقا سید مہدی طباطبائی یزدی سے تحصیل علوم فقہ وحدیث واصول فقہ وغیرہ فرمایا۔

۱۱۹۴ ھ میں زیارت مشہد مقدس سے مشرف ہوئے اور وہاں جناب سید مہدی بن سید ہدایت اللہ اصفہانی کی خدمت میں رہ کر کسب افادات فرمایا اور انہیں بزرگوں نے اجازہ ہائے اجتہاد دیئے اور ہندوستان تشریف لائے۔ آپ کا فضل و کمال و علو مرتبت و اجلال بیان سے باہر ہے۔ فقط یہی کافی ہے کہ ہندوستان میں دین اسلام آپ کے ہی وجود ذیجود سے پایا جاتا ہے۔ "شذورالعقیان" میں ہے کہ آیت اللہ فی العٰلمین الذی احی الدین فی الدیار الہند وطمس آثار البدع والجاہلیۃ مولانا السید دلدار علی النصیرآبادی۔ معروف محقق اور عالم دین آقا تہرانی آپ کے بارے میں لکھتے ہیں: "من اعاظم علماء الشیعۃ فی عصرہ ومن اشھر رجاال العلم فی الھند" اپنے دور کے عظیم علمائے شیعہ اور ھند کے معروف ترین علماء میں سے تھے۔

اس خاندان کے علماء نے جہاں دین اسلام کی تبلیغ اور اصلاح کا بیڑا اٹھایا، وہیں انھوں نے انگریز سامراج کے خلاف بھی شمع علم کے ذریعے مقاومت جاری رکھی۔ اسی خاندان کے علماء کے فتووں نے اودھ کے ہندوؤں اور مسلمانوں کو جوڑے رکھا۔ اودھ میں انگریزوں کے خلاف جہاد کا فتویٰ اسی خاندان کے علماء نے دیا اور بعدہ اہل اودھ کے حقوق کی جنگ بھی اسی خاندان کے افراد نے لڑی۔ آیت اللہ سید دلدار علی نقوی کے خاندان میں آٹھ پشتوں سے مجتہدین اور مراجع کی ولادت کا سلسلہ جاری ہے، علامہ سید علی نقی نقوی المعروف علامہ نقن جو پاکستان میں متعدد مرتبہ تشریف لائے، اسی خاندان سے تھے۔ علامہ نقن کے علاوہ آیت اللہ سید کاظم، آیت اللہ سید مرتضیٰ، آیت اللہ باقر نقوی، آیت اللہ محمد نقوی، آیت اللہ علی انور نقوی، آیت اللہ آقا حسن، آیت اللہ کلب حسین کا تعلق بھی اسی خانوادے سے ہے۔

ڈاکٹر کلب صادق کے دادا آیت اللہ سید آقا حسن اپنے زمانہ کے مجتہد تھے۔ آپ کے والد آیت اللہ سید کلب حسین بھی ایک عظیم عالم دین تھے۔ آپ نے ابتدائی تعلیم گھر میں اپنے والد گرامی سے حاصل کی اور اعلیٰ تعلیم کے لیے جامعہ سلطانیہ سلطان المدارس کا رخ کیا۔ وہاں سے صدر الافاضل کی سند حاصل کی، ساتھ ہی عصری تعلیم میں علی گڑھ مسلم یونیورسٹی سے بی اے کیا۔ لکھنؤ یونیورسٹی سے عربی زبان میں پی ایچ ڈی کی۔ ڈاکٹر کلب صادق اپنی قوم اور مسلم امہ کے حالات میں بہتری کے لیے مسلسل کوشاں رہتے تھے۔ وہ سمجھتے تھے کہ ہمارے مسائل کا حل علم میں ہے۔ علم کی طرف عوام کو راغب کرنا ان کا مستقل شیوہ تھا۔ اس کے لیے انھوں نے متعدد علمی اداروں کی بنیاد رکھی۔ مسلمانوں کی معاشی اور سماجی صورتحال کو بہتر بنانے کے لیے بھی انھوں نے متعدد فلاحی منصوبوں کا آغاز کیا۔

اپنی آخری ویڈیو جسے ایک طرح سے وصیت بھی کہا جاسکتا ہے، اس میں ڈاکٹر کلب صادق غربت کے خاتمے پر زور دیتے نظر آتے ہیں۔ ڈاکٹر کلب صادق دینی کے ساتھ ساتھ دنیاوی علوم میں مہارت پر بہت زور دیتے تھے اور چاہتے تھے کہ مسلمان ہر دو میدانوں میں کمال حاصل کریں، یہی مسلمانوں کی ترقی کا زینہ ہوسکتا ہے۔ آپ اتحاد بین المسلمین کے داعی تھے، ان کے خطابات اکثر اسی موضوع پر ہوتے، آپ کی عملی کاوشیں بھی اسی مقصد کے لیے تھیں۔ آپ نے توحید المسلمین ٹرسٹ کے نام سے ایک ادارہ قائم کیا، جس کے تحت متعدد علمی اور فلاحی ادارے قائم ہیں۔ ان اداروں میں سے چند ایک درج ذیل ہیں:
یونیٹی کالج لکھنؤ
یونیٹی مشن سکول لکھنؤ
یونیٹی انڈسٹریل ٹریننگ سنٹر لکھنؤ
یونیٹی پبلک سکول الہ آباد
ایم یو کالج علی گڑھ
یونیٹی کمپیوٹر سنٹر لکھنؤ
یونیٹی فری ایجوکیشن پروگرام لکھنؤ، جونپور، جلالپور، الہ آباد، باربنکی، مراد آباد، علی گڑھ وغیرہ۔
ہزہ خیراتی ہسپتال لکھنؤ
ٹی ایم ٹی میڈیکل سنٹر شکار پور
ٹی ایم ٹی پینشن سکیم برائے بیوگان
ٹی ایم ٹی سکالرشپ سکیم برائے یتماء

ڈاکٹر کلب صادق ایرا میڈیکل کالج و ہسپتال لکھنؤ کے صدر، آل انڈیا شیعہ کانفرنس کے سیکرٹری جنرل اور انجمن وظائف سادات و مومنین کے رکن بھی تھے۔ ڈاکٹر کلب صادق کے فرزند ڈاکٹر کلب سبطین نوری نے قلم کا میدان سنبھالا۔ آپ کئی کتابیں تحریر کرچکے ہیں اور حال ہی میں ڈاکٹریٹ مکمل کرکے تدریس کے میدان میں آنے کی تیاری میں ہیں۔ ڈاکٹر کلب صادق کے چھوٹے صاحبزادے سید کلب مہدی نقوی عرف منتظر، قرآن مجید کا ہندی میں ترجمہ کر رہے ہیں، جو آخری مراحل میں ہے اور جلد ہی نظروں کے سامنے آئے گا۔ ہندوستان میں ہی نہیں پاکستان میں بھی اس خاندان کے علماء قومی خدمت انجام دینے میں مشغول ہیں۔ ان میں سرِفہرست افراد میں علامہ نصیر اجتہادی کے بعد پاکستان کے نامور شاعر اقبالؔ جائسی کے فرزند اور علامہ سید کلب احمد مانیؔ جائسی کے پوتے مولانا حسن ظفر نقوی صاحب کا نام آتا ہے، جو پاکستان کے معروف علماء میں سے ہیں، تحریر اور تقریر دونوں میں ان کی خدمتیں ہیں۔ مولانا نصیر اجتہادی بھی پاکستان کے ایک بڑے عالم اور مقرر و خطیب تھے، جو قومی امور میں بڑھ چڑھ کر حصہ لے رہے تھے۔ ڈاکٹر محسن نقوی جو ماہنامہ پیام کی مجلس مشاورت میں بھی ہیں، کئی ایک کتب کے مصنف ہونے کے ساتھ ساتھ اسلامی نظریاتی کونسل کے رکن رہے کا تعلق بھی اسی خانوادے سے ہے۔

خبر کا کوڈ : 901380