فرعونوں کا انجام

اسلام ٹائمز۔ اس بارے میں کوئی دو رائے نہیں کہ ظالموں اور اپنے آپ کو ناخدا سمجھنے والے فرعونوں کا انجام ذلت و بربادی ہی ہوتا ہے۔ کیونکہ یہ آئین خداوندی ہے کہ اللہ کی لاٹھی بے آواز ہوتی ہے یا دوسرے لفظوں میں اللہ کے یہاں دیر ہے لیکن اندھیر نہیں۔ ایسا ہی عرب ممالک میں مسلط ڈکٹیڑز اور اپنے آپ کو ناخدا سمجھنے والوں کے ساتھ ہو رہا ہے اور یکے بعد دیگرے اپنے انجام کو پہنچ رہے ہیں۔ کسی کو عوامی تحریک و بیداری کی لہر لے اڑی تو کوئی ظالم ظالم سے ٹکرا کر تباہ و برباد ہوتا گیا۔ حال ہی میں مصر کی ایک خصوصی عدالت کی جانب سے سابق صدر حسنی مبارک کو موت کی بجائے کم سزاء دینے پر مصر میں احتجاجی مظاہرے جاری ہیں، اطلاعات کے مطابق گزشتہ دنوں حسنی مبارک کو سزائے موت نہ دینے کے فیصلے کے خلاف عوام نے التحریر اسکوائر پر مظاہرہ کیا، انہوں نے خدشہ ظاہر کیا کہ ججوں کے اس کمزور فیصلے کے نتیجے میں حسنی مبارک کی اپیل خارج ہو جائے گی۔