متحدہ علماء فورم جی بی کے وفد کی شیعہ علماء کونسل سندھ کے صدر علامہ اسد اقبال کیساتھ اہم نشست

اسلام ٹائمز۔ متحدہ علماء فورم جی بی کی علامہ اسد اقبال زیدی صدر شیعہ علماء کونسل سندھ کیساتھ اہم نشست ہوئی۔ جس کا باقاعدہ آغاز تلاوت قرآن پاک سے ہوا، جس کی سعادت برادر ارباب حسین نگری نے حاصل کی۔ جس کے بعد صدر متحدہ علماء فورم گلگت بلتستان حجۃ الاسلام شیخ غلام محمد شاکری نے علماء فورم جی بی کا تعارف اور اہداف و مقاصد کو مختصر طور پر بیان کیا۔ شیعہ علماء کونسل صوبہ سندھ کے صدر علامہ سید اسد اقبال زیدی نے نشست سے خطاب کرتے ہوئے کہا کہ قائد ملت جعفریہ علامہ سید ساجد علی نقوی کی حکمت اور دانشمندی کے نتیجے میں آج تشیع پاکستان بھر میں سرخرو ہے، سیاسی طور پر شیعہ علماء کونسل سندھ میں ایک مضبوط قوت کے طور پر اپنا کردار ادا کر رہی ہے۔ حالیہ ہونے والے بلدیاتی انتخابات میں اکثر و بیشتر جگہوں پر شیعہ علماء کونسل دوسری بڑی پارٹی تھی۔