اسلام ٹائمز۔ پاکستان تحریک انصاف کے مرکزی صدر اور سابق وزیراعلیٰ پنجاب چودھری پرویز الہٰی نے کہا ہے کہ سپریم کورٹ پاکستان کو سرزمین بے آئین نہیں بننے دے گی، آئین کو بچانے کیلئے پوری قوم سپریم کورٹ کے ساتھ کھڑی ہے۔ خیبر پختونخوا سے پی ٹی آئی ارکان کے وفد سے ملاقات کے موقع پر چودھری پرویز الہٰی نے کہا کہ مینار پاکستان پر آج پھر تاریخ رقم ہوگی، نا اہل حکمرانوں سے ہمیشہ کیلئے نجات حاصل کرنے کا آغاز ہوگا۔
انہوں نے کہا کہ شہروں کے راستے بند کرکے حکومت اوچھے ہتھکنڈوں پر عمل پیرا ہے، عوامی سمندر ان کے تمام حربے ناکام بنا دے گا، پاکستان کے عوام عمران خان کے ساتھ ہیں، یہی خوف حکمرانوں کو الیکشن کروانے نہیں دے رہا، صدر عارف علوی نے اپنے خط میں شہباز شریف پر فرد جرم عائد کر دی ہے۔