اسلام ٹائمز۔ بھارت میں پاکستانی ہائی کمشنر شاہد ملک نے بھارتی وزیر داخلہ سے ان کے دفتر میں ملاقات کی۔ شاہد ملک نے بھارتی وزیرداخلہ پی چدم برم سے ملاقات کے دوران کہا کہ پاکستان ممبئی حملوں سے متعلق جوڈیشل کمیشن بھیجنے کو تیار ہے۔ بھارتی میڈیا کے مطابق پاکستان کی جانب سے جوڈیشل کمیشن کو بھارت بھیجنے کا فیصلہ پاک بھارت سیکریٹری داخلہ کے مذاکرات میں کیا گیا تھا۔ پاکستانی جوڈیشل کمیشن ممبئی حملوں کے تحقیقاتی افسر اور اجمل قصاب کا بیان ریکارڈ کرنے والے مجسٹریٹ کا بیان ریکارڈ کرے گا۔ بھارت کی جانب سے تاریخوں کا تعین ہونے کے بعد پاکستانی جیوڈیشل کمیشن بھارت کا دورہ کریگا۔ جیوڈیشل کمیشن کے دورہ کا فیصلہ رواں سال مارچ میں سیکریٹری سطح کے مذاکرات میں کیا گیا تھا۔