غیر ملکی افواج کے انخلا کے بعد افغانستان میں کوئی جنگ نہیں ہوگی، ملا عمر

اسلام ٹائمز۔ طالبان کے سربراہ ملا عمر نے کہا ہے کہ افغانستان سے غیر ملکی افواج کے انخلا کے بعد اس ملک میں کوئی جنگ نہیں ہوگی، طالبان جنگ کے خاتمے کے خواہاں ہیں، صدر حامد کرزئی کو یقین دلاتا ہوں کہ غیر ملکی افواج کے افغانستان سے نکلنے کے بعد نوے کی دہائی کی طرح ملک میں خانہ جنگی نہیں ہوگی۔ طالبان کے سربراہ ملا محمد عمر نے عیدالاضحیٰ کے موقع پر جاری اپنے پیغام میں یقین دلایا ہے کہ افغانستان سے غیر ملکی افواج کے انخلا کے بعد اس ملک میں کوئی جنگ نہیں ہوگی، اس پیغام میں مزید کہا گیا ہے کہ طالبان جنگ کے خاتمے کے خواہاں ہیں اور اقتدار کو بھی صرف اپنے لئے نہیں چاہتے لیکن جب تک امریکہ کی قیادت میں افغانستان میں غیر ملکی افواج موجود ہیں جنگ جاری رہے گی۔

ملا عمر نے اپنے اس پیغام میں افغانستان کے صدر حامد کرزئی کو یقین دلایا کہ غیر ملکی افواج کے افغانستان سے نکلنے کے بعد نوے کی دہائی کی طرح ملک میں خانہ جنگی نہیں ہوگی۔ طالبان کے سربراہ نے پیغام میں کہا کہ افغانستان کے معاملات میں کسی بھی ملک کی مداخلت ناقابل قبول ہے۔