پشاور، ٹیکنیکل کالج میں شرپسند طلبہ کی غنڈہ گری کیخلاف آئی ایس او کا احتجاج

اسلام ٹائمز۔ امامیہ اسٹوڈنٹس آرگنائزیشن پشاور ڈویژن کے اراکین نے گورنمنٹ ٹیکنیکل کالج پشاور کے ہاسٹل میں شرپسند طلبہ کی غنڈہ گری کیخلاف کالج کے احاطے میں احتجاجی مارچ کیا، منگل کے روز 25 سے زائد شرپسند طلباء کے ایک ٹولے نے گورنمنٹ ٹیکنیکل کالج پشاور کے ہاسٹل میں آئی ایس او کے طلبہ کے اراکین کے کمرے پر دھاوا بولا اور وہاں اکابرین ملت جعفریہ کی تصاویر کی بے حرمتی کی، جس کے بعد امامیہ طلبہ کی ایک بڑی تعداد کالج میں جمع ہو گئی اور واقعہ کیخلاف احتجاجی مارچ کیا، بعدازاں آئی ایس او پشاور ڈویژن کے عہدیداروں اور کالج پرنسپل کے مابین مذاکرات ہوئے، کالج پرنسپل اور ایس ایچ او کو مذکورہ کمرے کا دورہ کرایا گیا اور وہ تصاویر بھی دکھائی گئیں جو شرپسند طلبہ نے پھاڑی تھیں۔
 
کالج پرنسپل نے امامیہ طلبہ کو یقین دہانی کرائی کہ وہ فوری طور پر اس واقعہ پر ایکشن لیں گے اور شرپسندی میں ملوث طلبہ کیخلاف کارروائی کی جائے، کالج پرنسپل کی اس یقین دہانی پر امامیہ طلبہ نے کالج انتظامیہ کو ایک دن کی مہلت دیدی، اور کہا گیا کہ اگر مطالبات منظور نہ ہوئے تو احتجاج کا راستہ اختیار کیا جائے گا۔