شاہ محمود قریشی کی اپنے وفد کے ہمراہ ایم ڈبلیو ایم ملتان کے رہنمائوں سے ملاقات

اسلام ٹائمز۔ پاکستان تحریک انصاف کے وائس چیئرمین مخدوم شاہ محمود قریشی نے مجلس وحدت مسلمین پاکستان ملتان کے رہنمائوں سے جامع مسجد الحسین (ع) نیو ملتان میں ملاقات کی۔ اس موقع پر پاکستان تحریک انصاف کے صوبائی اسمبلی کے اُمیدواران بیرسٹر وسیم خان بادوزئی اور ظہیرالدین ملیزئی ان کے ہمراہ تھے جبکہ اس موقع پر مجلس وحدت مسلمین کے مرکزی رہنما یافث نوید ہاشمی ایڈووکیٹ، ضلعی سیکرٹری جنرل علامہ سید اقتدار حسین نقوی، ضلعی سیکرٹری سیاسیات مہر سخاوت علی، ڈپٹی سیکرٹری جنرل محمد رضا صدیقی، شبر رضا زیدی و دیگر موجود تھے۔ تحریک انصاف کے رہنما شاہ محمود قریشی نے مجلس وحدت مسلمین کے رہنمائوں سے ملاقات کے دوران انتخابات میں حمایت کا مطالبہ کیا، جس پر مجلس وحدت مسلمین کے رہنمائوں کا کہنا تھا کہ ہمارا وہی فیصلہ ہے جو ہمارا مرکز کرے گا۔ اگر تحریک انصاف ملتان میں ہماری حمایت حاصل کرنا چاہتی تو مرکز سے رابطہ کرے مرکز جو فیصلہ کرے گا، ہمارا وہی فیصلہ ہوگا۔