اسلام ٹائمز۔ افغانستان میں گزشتہ ماہ اغوا ہونے والے دو پاکستانی سفارت کاروں کو بازیاب کرا لیا گیا۔ دفتر خارجہ کی جانب سے جاری بیان کے مطابق جلال آباد میں پاکستانی قونصلیٹ کے دو سفارت کاروں کو بحفاظت بازیاب کرا لیا گیا ہے جنہیں 16 جون 2017ء کو جلال آباد سے طورخم جاتے ہوئے اغوا کرلیا گیا تھا۔ دفتر خارجہ کے مطابق افغان صدر اشرف غنی نے کابل میں موجود پاکستانی ناظم الامور کو ٹیلی فون کرکے اطلاع دی کہ افغان سیکیورٹی فورسز نے ایک آپریشن میں دو پاکستانی سفارت کاروں کو بازیاب کرا لیا ہے۔ دفتر خارجہ کے مطابق بازیابی کے بعد دونوں اہلکاروں کو افغان وزارت دفاع کے حکام نے کابل میں پاکستانی سفارت خانے کے حوالے کردیا جبکہ یہ دونوں سفارت کار جلد اپنے اہل خانہ سے ملاقات کے لیے پاکستان آجائیں گے۔ اس سلسلے میں پاکستانی سیکریٹری خارجہ تہمینہ جنجوعہ نے پاکستانی عہدے داروں کی بحفاظت بازیابی پر افغان نائب وزیر خارجہ حکمت کرزئی کا شکریہ ادا کیا۔