اسلام ٹائمز۔ عوامی نیشنل پارٹی کے صوبائی صدر اصغر خان اچکزئی نے کہا ہے کہ سانحہ 8 اگست دل دہلانے والا سانحہ تھا۔ جب صوبہ کے اعلٰی تعلیم یافتہ، باشعور طبقہ کو انتہائی بے دردی اور سفاکیت سے ہم سے جدا کر دیا گیا۔ سانحہ 8 اگست سے متعلق کمیشن رپورٹ پر عملدرآمد نہ کرنے والے اور اس کے خلاف حکم امتناعی لینے والوں کو لواحقین کبھی بھول نہیں پائیں گے۔ حکمرانوں کو اس طرح کے قومی واقعات اور سانحات کے بارے کوئی فکر لاحق نہیں، بلکہ ان کی ترجیحات کچھ اور ہیں۔ لہٰذا پشتون، بلوچ اقوام نے ان حالات کا ادراک کرنا ہے۔ غیروں نے جو زخم پہنچانے تھے، وہ تو پہنچ چکے، لیکن اپنوں کا یہ کردار بھی بھلایا نہیں جاسکتا۔ جب صوبہ کی اتحادی حکومت نے سپریم کورٹ کی جانب سے تشکیل کردہ کمیشن کی سفارشات کیخلاف اپیل دائر کی، تو اسوقت قول و فعل میں واضح تضاد کی وجہ سے پشتونوں اور بلوچوں پر ان کے اصلی چہرے عیاں ہوچکے ہیں۔ عوام کبھی ان نام نہاد حکمرانوں کو معاف نہیں کریگی۔ سانحہ 8 اگست کی پہلی برسی کے موقع پر پارٹی نے احتجاجی پروگرام ترتیب دے رکھے ہیں، تمام ضلعی ہیڈکوارٹرز میں احتجاجی مظاہرے، شٹرڈاؤن ہڑتال اور تعزیتی ریفرنس کا انعقاد ہوگا۔