اسامہ کے بیٹے حمزہ بن لادن کی معلومات پر امریکہ کی طرف سے 10 لاکھ ڈالر انعام کا اعلان

2011ء میں امریکا کی خصوصی افواج نے پاکستان کے شہر ایبٹ آباد کے ایک کمپاؤنڈ میں اسامہ بن لادن کو ہلاک کر دیا تھا۔ امریکہ کا الزام ہے کہ ان کی سربراہی میں القاعدہ نے 11 ستمبر 2001ء کو امریکا میں حملہ کیا تھا جس میں لگ بھگ 3 ہزار افراد مارے گئے تھے۔ قبل ازیں سعودی عرب کی وزارت داخلہ نے حمزہ بن لادن کی شہریت منسوخ کرنے کا اعلان کیا تھا۔ مارچ 2018ء میں ان کی ایک ویڈیو سامنے آئی تھی جس میں انہوں نے سعودی شہریوں پر زور دیا تھا کہ وہ ملک کے بادشاہ کے خلاف لڑائی کی تیاری کریں۔ حمزہ بن لادن کو امریکا نے دو سال قبل عالمی دہشت گرد قرار دیا تھا۔ اسامہ بن لادن کے کمپاؤنڈ سے ملنے والے خطوط سے یہ واضح ہوا تھا کہ حمزہ ان کا پسندیدہ بیٹا تھا، جس نے القاعدہ میں ان کی جگہ لینی تھی۔