حکمرانوں میں کوئی امریکا کا چھوٹا ایجنٹ ہے تو کوئی بڑا، اسامہ اور اوباما ایک تصویر کے دو رخ ہیں، صاحبزادہ فضل کریم

لاہور:اسلام ٹائمز۔ سنی اتحاد کونسل کے چیئرمین صاحبزادہ فضل کریم نے کہا ہے کہ پاکستان میں دہشت گردی کی کارروائیاں امریکی طالبان کر رہے ہیں۔ طالبان اور مکتی باہنی والوں میں کوئی فرق نہیں، یہ بھی پاکستان کو غیرمستحکم کرنا چاہتے ہیں۔ ایوانِ اقبال لاہور میں استحکام پاکستان سیمینار سے خطاب کرتے ہوئے انہوں نے کہا کہ طالبان نواز سکیورٹی اداروں کو برداشت نہیں کیا جائیگا، تاہم ملکی سرحدوں کی حفاظت کرنے والوں پر جان بھی قربان ہے۔ صاحبزادہ فضل کریم نے کہا کہ سیاستدانوں کے درمیان اقتدار کی جنگ جاری ہے، ہمارے حکمرانوں میں کوئی امریکا کا چھوٹا ایجنٹ ہے تو کوئی بڑا، جبکہ ملک داخلی طور پر کمزور ہو چکا ہے، انہوں نے کہا کہ اسامہ اور اوباما ایک تصویر کے دو رخ ہیں، اسامہ مذہبی دہشت گرد تھا، جس نے 35 ہزار پاکستانیوں کو شہید کرایا۔