اسلام ٹائمز۔ لکی مروت میں نامعلوم تکفیری دہشت گردوں کی فائرنگ سے شہید ہونے والے معروف و ایوارڈ یافتہ پشتو شاعر اور امام بارگاہ کے متولی ظہور عباس افگار بخاری کی تدفین ان کے آبائی قبرستان میں کی گئی ہے۔ تکفیری دہشتگردوں کے قاتلانہ حملے میں جام شہادت نوش کرنے والے معروف شاعر اور شیعہ رہنما افگار بخاری کی نماز جنازہ ان کے آبائی قبرستان بخاری شاہ میں ادا کی گئی۔ نماز جنازہ میں شیعہ علماء کونسل کے مرکزی نائب صدر علامہ محمد رمضان توقیر اور خیبر پختونخوا کے صدر علامہ حمید حسین امامی نے شرکت کی۔ نماز جنازہ میں علم و ادب سے تعلق رکھنے والے افراد نے کثیر تعداد میں شرکت کی، البتہ سیاسی جماعت کے کسی عوامی نمائندے نے شرکت نہیں کی۔ واضح رہے کہ افگار بخاری کو کل رات کو نامعلوم شخص نے ان کے حجرے میں فائرنگ کرکے قتل کر دیا تھا۔