0
Sunday 28 Jun 2020 18:56

لیہ، مختلف سیاسی و مذہبی جماعتوں کیجانب سے ’’عظمت زہراء (س)‘‘ کانفرنس کا انعقاد

لیہ، مختلف سیاسی و مذہبی جماعتوں کیجانب سے ’’عظمت زہراء (س)‘‘ کانفرنس کا انعقاد
اسلام ٹائمز۔ لیہ میں شیعہ، سنی اکابرین کی جانب سے ‘‘عظمت زہراء سلام اللہ علیھا‘‘ کانفرنس کا انعقاد کیا گیا، جس میں 6 جماعتوں نے متفقہ طور پر مولوی اشرف جلالی کی جانب سے بی بی سیدہ (س) کی شان میں کی جانے والی گستاخی کی شدید الفاظ میں مذمت کرتے ہوئے فوری طور پر کارروائی کا مطالبہ کیا۔ تفصیلات کے مطابق ضلع لیہ کے علاقہ چوک اعظم میں سیاسی و مذہبی جماعتوں اور تمام مسالک سے تعلق رکھنے والے افراد کی طرف سے عظمت حضرت سیدہ فاطمہ زہراء سلام اللہ علیہ کانفرنس کا انعقاد کیا گیا۔ جس میں 6 سے زائد جماعتوں نے شرکت کی۔ کانفرنس میں حضرت سیدہ فاطمہ زہراء سلام اللہ علیہ، طیبہ طاہرہ کی شان بیان کی گئی۔ کانفرنس میں مجلس وحدت مسلمین کے رہنماء سید عدیل عباس زیدی، پاکستان عوامی راج پارٹی کے مرکزی رہنماء صابر عطاء، آل پاکستان مسلم لیگ کے مرکزی رہنماء محمد ثاقب ملانہ، پاکستان عوامی تحریک جنوبی پنجاب کے رہنماء قمر عباس دھول، مسلم لیگ (ق) کے ضلعی رہنماء ملک غضنفر چھینہ، تحریک منہاج القران کے ضلعی رہنما حاجی شوکت علی طاہر، ملت جعفریہ کے رہنماء سید سجاد حسین شاہ اور پاکستان پیپلز پارٹی کے ندیم بلوچ نے اپنی جماعتوں کے وفود سمیت شرکت کی۔

کانفرنس کا انعقاد ایک مقامی ہوٹل میں کیا گیا، عظمت زہراء (س) کانفرنس کے بعد تمام جماعتوں کی طرف سے مشترکہ اعلامیہ جاری کیا گیا، جس میں مولوی اشرف جلالی کی طرف سے حضرت سیدہ فاطمہ زہراء سلام اللہ علیہ کی شان میں گستاخانہ کلمات کی پرزور مذمت کی گئی اور اس سے ہمہ قسمی لاتعلقی کا اظہار کیا گیا۔ انہوں نے حکومت پر دباو دیتے ہوئے کہا کہ وہ اپوزیشن کا کردار ادا کرنے کی بجائے اپنا حکومتی کردار ادا کرے اور موجود قانون پر عملدرآمد کروائے۔ انہوں نے کہا کہ تمام مذاہب کی مقدس ہستیوں کی توہین بارے از سر نو آئین سازی کی جائے اور سزاوں کو سخت بنایا جائے۔ انہوں نے یہ بھی کہا کہ اشرف جلالی کی حمایت کرنے والے اور مذمت نہ کرنے والوں کے خلاف بھی کارروائی کی جائے۔ اس کے علاوہ اشرف جلالی کے خلاف درج کی گئی ایف آئی آر پر گرفتاری عمل میں لائی جائے اور لیہ تھانہ میں ایڈووکیٹ عرفان نقوی کی طرف سے دی گئی درخواست پر فوری طر پر مولوی اشرف جلالی کیخلاف مقدمہ درج کیا جائے۔ تمام جماعتوں نے ایکشن نہ ہونے پر آئندہ نئے لائحہ عمل کا بھی عندیہ دے دیا۔
خبر کا کوڈ : 871379
رائے ارسال کرنا
آپ کا نام

آپکا ایمیل ایڈریس
آپکی رائے

ہماری پیشکش