اسلام ٹائمز۔ اربعین شہدائے کربلاء کی مناسب سے بلوچستان کے داراحکومت کوئٹہ کے علاقے علمدار روڈ اور ہزارہ ٹاؤن میں جلوس عزاء نکالے گئے۔ اس موقع پر جلوسوں میں عزاداران ابا عبداللہؑ نے کثیر تعداد میں شرکت کی، جن میں جوانوں کے ساتھ ساتھ بچے اور بزگ بھی شامل تھے۔ جلوسوں کے دوران شیعہ کانفرنس کے صدر حاجی جواد رفیعی، ڈی آئی جی پولیس اظہر اکرام، عمائدین اور علمائے دین جلوس عزاء کی سربراہی کرتے ہوئے پیش پیش نظر آئے۔ جلوس عزاء میں سکیورٹی کے بھی سخت انتظامات نظر آئے۔ پولیس اور ایف سی کی بڑی تعداد جلوسوں کی حفاظت کے لئے تعئینات تھی اور دوپہر کے بعد انتظامیہ کی جانب سے موبائل سگنلز بھی بند کر دیئے گئے۔
علمدار روڈ سے برآمد ہونے والا جلوس عزاء بہشت زینب ہزارہ قبرستان میں اختتام پذیر ہوا جبکہ ہزارہ ٹاؤن کے جلوس کا اختتام ہزارہ قبرستان ہزارہ ٹاؤن پر ہوا۔ اس موقع پر علمدار روڈ میں جامع مسجد خاتم الانبیاء کے قریب مجلس عزاء اور نماز باجماعت کا بھی اہتمام کیا گیا۔ مجلس عزاء سے علامہ ڈاکٹر سید احمد کاظمی اور علامہ محمد کاظم بہجتی نے خطاب کیا، جبکہ نماز ظہرین کی امامت علامہ ڈاکٹر محمد موسیٰ حسینی نے کی۔ اس کے علاوہ جگہ جگہ سبیلیں بھی لگائی گئی تھیں اور رضاکارانہ طور پر خون عطیہ کرنے والوں کے لئے بھی انتظامات کئے گئے تھے۔
