اسلامی تحریک پاکستان اور تحریک انصاف میں اتحاد متوقع

اسلام ٹائمز۔ مجلس وحدت مسلمین پاکستان کے بعد اسلامی تحریک پاکستان نے بھی پاکستان تحریک انصاف کیساتھ اتحاد کرنے کا فیصلہ کر لیا ہے۔ ذرائع  نے ’’اسلام ٹائمز‘‘ کو بتایا کہ دونوں جماعتوں کی اعلیٰ قیادت آج شام لاہور میں ملاقات کرے گی، جہاں باہمی اتحاد کے حوالے سے تبادلہ خیال کیا جائے گا۔ ذرائع کے مطابق پاکستان تحریک انصاف کی نمائندگی مرکزی وائس چیئرمین پی ٹی آئی شاہ محمود قریشی، ڈاکٹر پیر نورالحق قادری، میاں محمود الرشید، ڈاکٹر یاسمین راشد، میاں حماد اظہر، شیخ امتیاز احمد، علامہ اصغر عارف چشتی کریں گے۔

اسلامی تحریک پاکستان کے وفد میں مرکزی جنرل سیکرٹری اسلامی تحریک علامہ ڈاکٹر شبیر حسن میثمی، مرکزی نائب صدر علامہ عارف حسین واحدی، مرکزی نائب صدر علامہ سید سبطین حیدر سبزواری، مرکزی رہنماء علامہ حافظ کاظم رضا نقوی، قاسم علی قاسمی، ملک شوکت علی اعوان، سید جعفر علی شاہ اور چودھری صغیر عباس ورک شامل ہوں گے۔ ملاقات میں ضمنی الیکشن میں ایک دوسرے کیساتھ تعاون کا معاہدہ متوقع ہے۔ ذرائع کا کہنا ہے کہ دونوں جماعتوں کے قائدین میں یہ ملاقات گلبرگ لاہور میں ہوگی۔ ملاقات کے بعد دونوں جماعتوں کے قائدین مشترکہ پریس کانفرنس بھی کریں گے۔