کشمیر کے عوام پچھلے کئی عشروں سے بھارتی ظلم و جبر کے شکار ہیں، جان محمد جمالی

اسلام ٹائمز۔ بلوچستان کے قائمقام گورنر میر جان محمد جمالی نے یوم یکجہتی کشمیر کے موقع پر کہا ہے کہہ کشمیر کے عوام پچھلے کئی عشروں سے بھارتی ظلم و جبر کے شکار ہیں۔ اس ضمن میں پاکستان نے روز اول سے کشمیر اور کشمیری قوم کی سیاسی اور سفارتی حمایت جاری رکھی ہے اور انکے ساتھ ہونے والے ظلم و زیادتی کو دنیا کے ہر فورم پر اُجاگر بھی کرتا آرہا ہے۔ انہوں نے اپنے بیان میں کہا کہ پانچ فروری کو کشمیر ڈے منانے کا مقصد اپنے کشمیری بھائیوں کی جدوجہد آزادی کی مکمل حمایت کرنا ہے۔ پاکستان کا شروع سے واضح موقف ہے کہ اقوام متحدہ کی قراردادوں کی روشنی میں مقبوضہ کشمیر کے عوام کو حق خودارادیت دیا جائے تاکہ وہ اپنے مستقبل کا فیصلہ خود کر سکیں۔

لہٰذا عالمی رائے کو انکے حق میں استوار کرنا اشد ضروری ہے۔ قائمقام گورنر بلوچستان نے کہا کہ بھارت کی جانب سے مقبوضہ کشمیر پر اسکا مکمل قبضہ اور بھارتی آئین کے آرٹیکل 370 اور 35A  کی منسوخی نہ صرف تمام قوانین اور اقدار کی خلاف ورزی ہے، بلکہ اس سے بھارت کا اپنا غیرجمہوری چہرہ بھی دنیا کے سامنے بے نقاب ہوا۔ کشمیریوں کی جدوجہد آزادی کو روکنے کیلئے ان پر مختلف قسم کے مظالم ڈھائے جا رہے ہیں۔ لیکن اسکے باوجود وہ انتہائی صبر و استقامت کے ساتھ ان تمام مظالم اور کٹھن حالات کا مقابلہ کرتے ہوئے اپنی آزادی کے حصول کیلئے جدوجہد کر رہے ہیں۔ میر جان محمد جمالی نے کہا کہ وہ دن دور نہیں جب کشمیری قوم اپنی جدوجہد میں مکمل طور پر کامیاب اور سرخرو ہونگے۔