اسلام ٹائمز۔ پشاور تاحال دہشتگردی کے سائے سے باہر نہیں نکل سکا، آج نواحی علاقے داوٴدزئی میں پولیس موبائل پر ریموٹ کنٹرول بم حملے کے باعث سب انسپکٹر جاں بحق جبکہ 3 پولیس اہلکار زخمی ہوگئے۔ پولیس کے مطابق تھانہ داوٴدزئی کی حدود میں واقع تختہ آباد روڈ پر پولیس موبائل معمول کے گشت پر تھی کہ اس دوران دہشتگردوں نے سٹرک کے کنارے نصب بارودی مواد کو ریموٹ کنٹرول کے ذریعے اڑا دیا، جس سے سب انسپکٹر داد محمد خان جاں بحق اور 3 پولیس اہلکار زخمی ہوگئے۔ زخمی پولیس اہلکاروں کو لیڈی ریڈنگ اسپتال منتقل کردیا گیا۔ پولیس کے مطابق دھماکے میں 500 گرام بارودی مواد استعمال کیا گیا جو دیسی ساخت کا تھا۔