اسلام ٹائمز۔ ایران نے کہا کہ ایٹمی ہتھیار سکیورٹی اور سیاسی طاقت کے لئے سنگین خطرہ ہیں۔ غیرملکی خبررساں ایجنسی کے مطابق اقوام متحدہ کی عالمی ایٹمی توانائی ایجنسی کے لئے ایران کے نمائندے علی اصغر سلطانیہ نے سی ٹی بی ٹی کمیشن کے اجلاس سے خطاب کرتے ہوئے کہا کہ ایٹمی ہتھیار نہ تو سکیورٹی فراہم کرتے ہیں اور نہ ہی سیاسی طاقت میں اضافہ کرتے ہیں، بلکہ یہ سکیورٹی اور سیاسی طاقت کیلئے سنگین خطرہ ہیں۔ انہوں نے کہا کہ یہ بات انتہائی افسوسناک ہے کہ سی ٹی بی ٹی اور این پی ٹی جیسے معاہدوں کے باوجود ہتھیاروں کے عدم پھیلاؤ کے حوالے سے کوئی واضح پیشرفت نہ ہوسکی۔ انہوں نے کہا کہ ایران ایٹمی ہتھیاروں سے پاک مشرق وسطٰی کے لئے پرعزم ہے، تاہم وہ پرامن مقاصد کے لیے جوہری توانائی کے اپنے حق سے دستبردار نہیں ہوگا۔ ایرانی سپریم لیڈر آیت اللہ سید علی خامنہ ای کی جانب سے جوہری ہتھیاروں کے خلاف بیان کے بارے میں انہوں نے کہا کہ ایران جوہری ہتھیاروں کی پیداوار اور ان کے استعمال کو قبرستان بنانے کے مترادف سمجھتا ہے۔