شام میں تکفیری دہشتگردوں کی ایک اور جسارت، حرم حضرت زینب (س) پر راکٹوں سے حملہ

اسلام ٹائمز۔ شام میں حضرت زینب (س) کے روضے پر راکٹوں سے حملہ کیا گیا، ایک راکٹ حرم مطھر کے صحن میں آکر گرا، جس کے پھٹنے سے حرم حضرت زینب (س) کے دفتری امور کے سربراہ انس رومانی شہید جبکہ چند دیگر افراد زخمی ہوگئے ہیں۔ ابھی تک اس بارے میں کوئی اطلاعات نہیں ہیں کہ آیا اس راکٹ کے پھٹنے سے خود حرم مطہر حضرت زینب (س) کو بھی نقصان پہنچا ہے یا نہیں۔ راکٹ حملے کے بعد امدادی کارروائیاں جاری ہیں۔
دیگر ذرائع کے مطابق شام میں حضرت زینب (س) کے روضے پر حکومت مخالف باغی دہشتگردوں نے راکٹوں سے حملہ کر دیا ہے۔ اس رکٹ حملے میں حرم حضرت زینب (س) کے دفتری امور کے سربراہ انس رومانی شہید جبکہ چند دیگر افراد زخمی ہوگئے ہیں۔ شامی دارالحکومت دمشق کے نواح میں سرکاری فوج سے لڑائی میں باغی دہشتگردوں نے حضرت زینب (س) کے حرم پر بھی راکٹ برسائے۔ حملے کے وقت حرم میں زائرین بھی موجود تھے۔ ایک راکٹ مزار کے احاطے میں پھٹا جس سے حرم کے دفتر امور کے انچارج شہید جبکہ متعدد افراد زخمی ہوگئے۔ چند ماہ پہلے بھی حضرت زینب (س) کے حرم مطہر پر ایسا حملہ ہو چکا ہے۔