اسلام ٹائمز۔ بنوں کے قریبی علاقے سرائے نورنگ سے کالعدم تحریک طالبان کا مقامی کمانڈر گرفتار کرلیا گیا ہے۔ سکیورٹی فورسز نے سرائے نورنگ کے علاقے میں کارروائی کرتے ہوئے مقامی طالبان کمانڈر کو گرفتار کیا۔ فوج کے ادارہ تعلقات عامہ (آئی ایس پی آر) کے مطابق سکیورٹی فورسز نے خفیہ اطلاعات پر بنون کے قریبی علاقے سرائے نورنگ میں سرچ آپریشن کرتے ہوئے دہشت گرد تنظیم تحریک طالبان کے مقامی کمانڈر رسول خان کو گرفتار کر کے بھاری تعداد میں اسلحہ اور بارود بھی برآمد کر لیا ہے۔ طالبان کمانڈر سے 100 شناختی کارڈز اور تین جعلی پاسپورٹ بھی برآمد کر لیے ہیں۔ آئی ایس پی آر کا کہنا ہے کہ گرفتار کمانڈر فاٹا اور خیبر پختونخوا میں دہشت گردی کی کارروائیوں میں بھی ملوث تھا۔