اسلام ٹائمز۔ آل کوئٹہ تفتان ٹرانسپورٹرز یونین کے صدر حاجی جمعہ خان بادینی نے کہا ہے کہ کوئٹہ تفتان روٹ پر قائم چیک پوسٹوں پر مسافروں کیساتھ نامناسب رویہ کیخلاف آل کوئٹہ تفتان ٹرانسپورٹرز نے غیر معینہ مدت تک ہڑتال کردی ہے۔ روزانہ کوئٹہ سے تفتان کیلئے 18 گاڑیاں جاتی ہیں اور اسی طرح تفتان سے بھی 18 گاڑیاں آتی ہیں۔ تفتان روٹ پر سفر کرنے والے مسافروں، ٹرانسپورٹروں اور کوچز عملے کی چیک پوسٹوں پر تذلیل کی جاتی ہے۔ جسکی وجہ سے مسافروں کو شدید مشکلات درپیش ہیں۔ ہم سیکورٹی کیخلاف نہیں، بلکہ ہم چاہتے ہیں کہ ہمیں بھی زائرین کے کانوائے میں شامل گاڑیوں کیساتھ چلایا جائے۔