اسلام ٹائمز۔ الیکشن کمیشن نے خیبر پختونخوا ضمنی بلدیاتی انتخابات کا شیڈول جاری کر دیا ہے، الیکشن کمیشن کے جاری شیڈول کے مطابق ضمنی بلدیاتی انتخابات کے لیے پولنگ 18 جولائی کو ہوگی۔ کاغذات نامزدگی 15 اور 16 جون کو جمع کروائے جا سکیں گے، کاغذات نامزدگی پر اعتراضات 20 جون کو دائر کیے جا سکیں گے۔ کاغذات کی جانچ پڑتال کا عمل 21 اور 22 جون کو ہوگا، کاغذات منظور یا مسترد ہونے پر اپیلیں 23 اور 24 جون کو دائر ہوں گی۔ اپیلوں پر فیصلے 27 سے 30 جون تک ہوں گے۔ امیدوار اپنے کاغذات یکم جولائی کو واپس لے سکیں گے، یکم جولائی کو ہی امیدواروں کو انتخابی نشانات الاٹ کیے جائیں گے۔ شیڈول کے اجراء کے ساتھ ہی انتخابی حلقوں میں ووٹر فہرستیں منجمد کر دی گئیں۔ انتخابی حلقوں میں تقرریوں اور تبادلوں پر پابندی عائد کر دی گئی۔