0
Thursday 8 Dec 2016 19:50

عید میلادالنبی کی مناسبت سے ہفتہ وحدت و اخوت، عقیدت واحترام کے ساتھ منایا جائے، علامہ ساجد نقوی

عید میلادالنبی کی مناسبت سے ہفتہ وحدت و اخوت، عقیدت واحترام کے ساتھ منایا جائے، علامہ ساجد نقوی
اسلام ٹائمز۔ شیعہ علماء کونسل اور اسلامی تحریک کے سربراہ علامہ سید ساجد علی نقوی نے عید میلادالنبی کی مناسبت سے 12تا 17 ربیع الاول ملک بھر میں ہفتہ وحدت و اخوت منانے کا اعلان کرتے ہوئے دنیا بھر کے مسلمانوں کو مبارک باد پیش کی۔ اُنہوں نے کہا ہے کہ حکم قرآنی اور سیرت معصومین کا تقاضا ہے کہ امت محمدی کی وحدت اور اتحاد کے لئے کام کیا جائے۔ کارکن عیدمیلادالنبی کے مشترکہ پروگرامز اور اجتماعات منعقد کریں۔ سینکڑوں مشترکات کو بنیاد بنا کر معمولی اختلافی مسائل کو پس پشت ڈال کر ملت اسلامیہ کی وحدت کا عملی مظاہرہ کریں۔ ہفتہ وحدت کی مناسبت سے اپنے پیغام میں علامہ سید ساجد علی نقوی نے پیغمبر گرامی کی سیرت سے درس لیتے ہوئے باہمی اختلافات اور فروعی و جزوی مسائل کے حل کے لئے امن، محبت، رواداری، تحمل اور برداشت کا راستہ اختیار کرتے ہوئے امت مسلمہ میں شیعہ سنی کی تفریق، مسلکی اختلافات کے خاتمے، امن و آشتی کے فروغ کا راستہ اپنا کر ہم خالق کائنات اور منجی بشریت رحمت اللعالمین کی خوشنودی حاصل کر سکتے ہیں۔ علامہ ساجد نقوی نے واضح کیا کہ خاتم المرسلین کی میلاد کا جشن منانے کا سب سے بہتر طریقہ یہ ہے کہ امت مسلمہ بالخصوص اور عالم انسانیت بالعموم حضور اکرم کی سیرت، سنت اور فرامین پر عمل کرے اور اپنی انفرادی، اجتماعی، روحانی، دینی و دنیاوی مسائل کا حل تلاش کرنے کے لئے حضور اکرم کے اسوہ حسنہ کو نمونہ عمل قرار دے۔ انہوں نے کہا کہ پیغمبر اکرم نے قرآن کریم، اہل بیت، احادیث، اسلامی تعلیمات کی شکل میں نظریہ اور اپنی سیرت عالیہ کی شکل میں عمل کا جو اثاثہ ہمارے لئے چھوڑا ہے اس پر صحیح معنوں میں عمل کرنا ہی ہمارے لئے باعث نجات ہے۔ ان کا کہنا تھا کہ قرآنی تعلیمات اور اسلام کی عملی تعبیر کے لئے ہمیں سیرت رسول اکرم سے استفادہ کرنا ہوگا، لیکن بدقسمتی سے امت مسلمہ عملی طور پر ان تعلیمات پر عمل پیرا نہیں ہے، جس کی وجہ سے مسلسل مصائب و آلام میں مبتلا ہے۔ علامہ ساجد نقوی نے عوام اور کارکنوں کو ہدایت کی کہ وہ ہفتہ وحدت کے دوران تمام مسالک، مکاتب فکر کے مابین وحدت و یگانگت ایجاد کرنے، فرقہ وارانہ ہم آہنگی کے فروغ کے لئے مشترکہ پروگرامز اور اجتماعات منعقد کریں۔ سینکڑوں مشترکات کو بنیاد بنا کر معمولی اور جزوی نوعیت کے اختلافی مسائل کو پس پشت ڈال کر ملت اسلامیہ کی وحدت کا عملی مظاہرہ کریں اور انسانیت دشمن عناصر پر واضح کریں کہ وہ ان کے اتحاد و وحدت کو کسی صورت نقصان نہیں پہنچا سکتے۔
خبر کا کوڈ : 589888
رائے ارسال کرنا
آپ کا نام

آپکا ایمیل ایڈریس
آپکی رائے

ہماری پیشکش