غیر قانونی مدارس کیخلاف کارروائی وفاق کا نہیں بلکہ سندھ حکومت کا کام ہے، عابد شیر علی

اسلام ٹائمز۔ وزیر مملکت برائے پانی و بجلی عابد شیر علی نے کہا ہے کہ ملک کو ترقی کی راہ سے نکالنے اور دھرنا سیاست کرنے والوں کا احتساب قوم کرے گی، عمران خان جہانگیر ترین کے منشی بنے ہوئے ہیں اور ان کے جہاز میں گھومتے ہیں، پاناما کیس میں وزیراعظم اور ان کی فیملی سرخرو ہوگی، لاڑکانہ میں ترقیاتی کاموں کے نام پر 90 ارب روپے کی خورد برد کی گئی، اگر یہ رقم کراچی میں استعمال کی جاتی تو شہر پیرس بن جاتا، وزیراعلیٰ پنجاب اور ان کی ٹیم سے کہوں گا کہ وہ کراچی کی صفائی کا ذمہ بھی اپنے سر لے لیں۔ ان خیالات کا اظہار انہوں نے کراچی میں پورٹ قاسم پر بن قاسم کول الیکٹرک پاور پلانٹ کے دورے کے موقع پر میڈیا سے بات چیت کرتے ہوئے کیا۔ عابد شیر علی نے کہا کہ کوئلہ سے چلنے والے 1320 میگاواٹ کے اس پلانٹ کا 80 فیصد کام مکمل ہوچکا ہے، منصوبے پر انتہائی تیزی کے ساتھ کام جاری ہے، ایسا لگتا ہے کہ یہاں جنات نے کام کیا ہے، مسلم لیگ ن کی حکومت نے ملک کو اندھیروں سے نکالنے کا عزم کر رکھا ہے، مارچ 2018ء تک پورے ملک سے لوڈشیڈنگ کا خاتمہ کردیا جائے گا۔ انہوں نے کہا کہ سندھ پاکستان کی آنکھیں ہیں جس کے بغیر روشنی نہیں مل سکتی، تاہم صوبے میں کرپشن اپنے عروج پر ہے، لاڑکانہ میں ترقیاتی کاموں کے نام پر 90 ارب روپے کی رقم خورد برد کی گئی، اگر یہ رقم کراچی میں استعمال کی جاتی تو یہ شہر آج پیرس بن چکا ہوتا، کراچی کی حالت زار دیکھ کر مجھے افسوس ہورہا ہے، شہر کی سڑکیں ٹوٹ پھوٹ کا شکار ہیں اور گندگی کا ڈھیر لگا ہوا ہے، میں وزیراعلیٰ پنجاب میاں شہباز شریف اور ان کی ٹیم سے درخواست کروں گا کہ وہ کراچی کی صفائی کے لئے بھی اپنا کردار ادا کریں۔