تعلیمات اسلامی کی پیروی میں انسانیت کی نجات ہے، علامہ عون نقوی

اسلام ٹائمز۔ ادارہ تبلیغ و تعلیمات اسلامی کے سربراہ علامہ محمد عون نقوی نے کہا ہے کہ تعلیمات اسلامی کی پیروی میں انسانیت کی نجات اور فلاح ہے۔ مسجد اقصیٰ محمود آباد، مسجد باب العلم، امام بارگاہ شہدائے کربلا، مسجد و امام بارگاہ آخر الزماں اور دیگر مقامات پر منعقدہ اجتماعات سے خطاب کے دوران انہوں نے کہا کہ دین کے سنہری اصولوں اور آئمہ طاہرین کی تعلیمات میں ہر دور کے انسانوں کیلئے رہنمائی موجود ہے، لہٰذا ہمیں ان مقدس اور اہم شخصیات کے نقش قدم پر چلنا ہوگا جن کی محبت کا حکم دیا گیا ہے۔ انہوں نے دنیا بھر میں بسنے والے مسلمانوں سے کہا کہ وہ فروعی اختلافات کو بھلا کر یکجا ہوں کیونکہ اسلام دشمن قوتیں پوری دنیا میں مسلمانوں کا خون بہا رہی ہیں، جس کے خاتمے کیلئے ہمیں ٹھوس اور مؤثر اقدامات پر عمل کرنا ہوگا۔