پاناما کیس پر سپریم کورٹ کے تاریخی فیصلے سے انصاف اور قانون کا بول بالا ہوا ہے، امجد علی وڑائچ

اسلام ٹائمز۔ نیشنل مسلم لیگ فیصل آباد کے چیئرمین چوہدری امجد علی وڑائچ نے فیصل آباد میں میڈیا سے گفتگو کرتے ہوئے کہا ہے کہ پاناما کیس پر سپریم کورٹ کے تاریخی فیصلے سے انصاف اور قانون کا بول بالا ہوا ہے، آل شریف کی بادشاہت کا سورج ہمیشہ کے لئے غروب ہو گیا ہے، پوری قوم سپریم کورٹ کے ججز کو میرٹ پر فیصلہ سنانے پر سلام پیش کرتی ہے۔ انہوں نے کہا کہ وزیراعظم نواز شریف کا نااہل ہونا حق و سچ کی فتح ہے، سپریم کورٹ نے تاریخی فیصلہ دے کر عدلیہ کا سر فخر سے بلند کر دیا ہے، نادان لوگوں کو سمجھ لینا چاہئے کہ کرپشن اس ملک کا سب سے بڑا مسئلہ ہے، جو تمام برائیوں کی جڑ ہے۔ انہوں نے کہا کہ اقتدار میں رہنے والے تمام افراد کے کھاتے کھولے جائیں اور تمام کرپٹ افراد کو بے رحم احتساب کی زد میں لایا جائے، احتساب اور انصاف کے بغیر ملک آگے نہیں بڑھ سکتا۔