اسلام ٹائمز۔ نائب امیر جماعت اسلامی پاکستان حافظ محمد ادریس نے لاہور سے جاری کیے گئے اپنے بیان میں کہا ہے کہ ماہ محرم اور واقعہ کربلا امت مسلمہ کے لیے ایک عظیم درس ہے، اسلامی نظام حکومت کی بحالی اور آمریت و موروثی حکمرانی سے نجات کے لیے نواسؑہ رسول اور ان کے پورے خاندان نے جو قربانی دی، اسے محض روایتی اور خرافاتی انداز میں منا لینا شہادت حسینؑ کی توہین ہے، اس واقعہ پر یہ سبق ملتاہے کہ ظالم کا ساتھ دینا کسی بھی مخلص مومن کا شیوہ نہیں، ماہ محرم میں امت کے اندر تفرقہ ڈالنے کی بجائے اپنی صفوں میں اتحاد و اتفاق کی ضرورت ہے، جو لوگ شہدائے کربلا کی یاد میں محفلیں منعقد کرتے ہیں مگر اپنے دور کے یزیدیوں کے ہم نوا اور حمایتی بنتے ہیں، وہ پیغام شہادت کو سمجھے ہی نہیں، سیدنا حسیؑن نے تو ثابت کر دیا تھاکہ سر کٹ کے نیزے کی نوک پر پرو دیا جائے، تب بھی حق کے مقابلے میں یزیدیوں کی اطاعت قبول نہیں، پاکستان اسلام کے نام پر وجود میں آیا، یہ اسلام کا قلعہ ہے ہمیں عہد کرنا چاہیے کہ ہم کوفیوں کا کردار ادا نہیں کریں گے، بلکہ اپنے پیارے وطن اور اس کے بنیادی نظریے کی حفاظت کریں گے۔