آرمی پبلک سکول پشاور کے بہادر بچوں اور اساتذہ کی قربانیوں سے امن نصیب ہوا، عثمان بزدار

اسلام ٹائمز۔ وزیراعلیٰ پنجاب سردار عثمان بزدار نے کہا ہے کہ 16 دسمبر 2014ء کے دن سفاک درندوں نے معصوم بچوں کے خون سے ہولی کھیلی، سفاک درندوں نے آرمی پبلک سکول پشاور میں معصوم بچوں کو بدترین بربریت کا نشانہ بنایا۔ وزیراعلیٰ پنجاب نے آرمی پبلک سکول پشاور کے شہداء کی چوتھی برسی کے موقع پر پیغام میں کہا ہے کہ قیام امن کے عظیم مقصد کے حصول کیلئے معصوم بچوں کا بہنے والا خون رنگ لایا ہے، ان بچوں اور اساتذہ نے عظیم مقصد کے حصول کیلئے اپنی جانوں کی عظیم قربانی دی۔ انہوں نے لاہور سے جاری کیے گئے پیغام میں کہا ہے کہ آرمی پبلک سکول پشاور کے بچوں نے بہادری اور جرأت کی نئی تاریخ رقم کی، قوم کے بہادر بچوں اور اساتذہ کی لازوال قربانیوں کے باعث وطن عزیز کو امن نصیب ہوا۔