لاہور پولیس کے متعدد افسران رشوت خور نکلے، فہرست تیار

اسلام ٹائمز۔ لاہور میں جرائم پر قابو پانا مشکل ہی نہیں ناممکن ہوگیا، لاہور پولیس کے اعلیٰ افسران ہی رشوت خور نکلے۔ سی پی او بشیر احمد ناصر نے کرپٹ پولیس افسران کی لسٹ تیار کر لی ہے۔ پولیس افسروں کے قحبہ خانوں، منشیات فروشوں اور جوا خانوں سے رشوت لینے کا انکشاف سامنے آیا ہے، رشوت لینے والے 14 ڈی ایس پیز اور 14 انسپکٹرز کی فہرست نے تہلکہ مچا دیا ہے۔ ذرائع کے مطابق ڈی ایس پی ذوالفقار بٹ کا نام رشوت وصول کرنیوالوں میں سرفہرست ہے، ڈی ایس پی لوئرمال شوکت علی شیخ، ڈی ایس پی ملک عبدالغفور، ڈی ایس پی ابراہیم، ڈی ایس پی عثمان، ڈی ایس پی لائسنسنگ امتیاز الرحمان، ڈی ایس پی ڈیفنس سجاد حیدر، ڈی ایس پی لوئر مال نوید اکمل، ڈی ایس پی سی آئی اے عثمان حیدر رشوت خور افسران میں شامل ہیں۔

ڈی ایس پی ٹریفک ندیم بٹ، ڈی ایس پی سکیورٹی میاں ابصار بھی رشوت لینے میں پیش پیش ہیں، ڈی ایس پی ٹاؤن شپ اعجاز علی، ڈی ایس پی پی ایچ پی لاہور طاہر اقبال وڑائچ، ڈی ایس پی خالد محمود تبسم بھی رشوت خور نکلے، انسپکٹر حسنین حیدر، ایس ایچ او نوانکوٹ علی عباس، ایس ایچ او ملت پارک طاہر اکرام بھی رشوت لینے والوں میں شامل ہیں۔ سی سی پی او لاہور بشیر احمد ناصر نے رشوت خور افسران کیخلاف ایکشن لینے کیلئے ڈی آئی جی آپریشنز، ڈی آئی جی انویسٹی گیشن اور ڈی آئی جی سکیورٹی کو مراسلہ تو لکھ دیا مگر پنجاب پولیس کے اعلیٰ افسران کا یہ کارنامہ محکمہ پولیس کی کارکردگی پر کئی سوال چھوڑ گیا۔