مولانا فضل الرحمان کی مجلس احرار اسلام کے 90 سال مکمل ہونے پر مبارکباد

اسلام ٹائمز۔ جمعیت علماء اسلام پاکستان کے سربراہ مولانا فضل الرحمن  نے مجلس احرار کے نائب امیر سید محمد کفیل بخاری سے ٹیلی فونک رابطہ کرکے مجلس احرار کے 90سالہ یوم تاسیس پر مبارک باد پیش کی۔ مولانا فضل الرحمن نے گفتگو کرتے ہوئے کہا کہ مجلس احرار اسلام کی تاسیس کے نوے سال مکمل ہونے پر دل کی گہرائیوں سے مبارک باد پیش کرتا ہوں۔ انہوں نے کہا کہ جمعیت علمائے اسلام اور مجلس احرار اسلام کی باہمی محبت و اشتراک عمل قائم رہنا چاہیے۔ اس موقع پر مجلس احرار کے مرکزی نائب صدر سید محمد کفیل نے کہا کہ احرار مذہبی جماعتوں کی فطری حلیف ہے اور ختم نبوت و ناموس رسالت کے محاذ پر احرار کارکن جمعیت علمائے اسلام کی جدوجہد کو تحسین کی نگاہ سے دیکھتے ہیں۔ انہوں نے کہا کہ احرار اور جمعیت ایک ہی چمن کے پھول ہیں، ان پھولوں کی مہک سے یہ چمن معطر رہے گا۔